Cultura

L’Ostau Occitan vos perpausa de descobrir artistas de Gironda o a l’entorn qu’an hèit la causida de s’exprimir en occitan. Cadun hornís la pròva, s’en avèvan besonh, qu’aquesta cultura n’es pas mòrta, e pòt quitament produíser òbras dignas d’interès. Amèi de la musica o deu teatre, l’occitan es tanben una literatura millenària enqüèra viva, e que constituís un deus axes de nòsta accion. Enfin, per hèser valer tot aquò, seguissetz l’actualitat deus principaus lòcs de difusion de la cultura occitana en Gironda !

 

Creacion Artistica

Isabelle Loubère

Cie Parler Noir

Gric de Prat

Gric de Prat

Lous Caps Negues

Lous Caps Negues

Thèu

Thèu

Tre Fontane

Tre Fontane

Vieussens

Vieussens

Publicacions

Espècias de Medòc

Los Tradinaires

Boha

Publicacions & Prèmis

Hestenaus

Nuits Atypiques

Nuits Atypiques

Occitania Mon Amour

Occitania Mon Amour

Festival ?

Hestenau Occitan Mascaret

Creacion Artistica

Isabelle Loubère

Compagnie du Parler Noir

Guidada per Isabelle Loubère, contaira e comediana que s’es dempui bèra pausa atalada a har passar sa lenga e sa cultura occitana, tot purmèir en mitan escolari, avant de montar sus l’empont per lo plaser de tots, La Cie du Parler Noir vòu har víver la lenga e la cultura d’Aquitània preu mijan de spectacles contemporanèus. L’univèrs de Bernat Manciet, poèta defuntat en 2005, es atau entèirament (e sincèrament) recreat, per de dispositius audaciós, que barrejan arts plastics, son, imatges, lutz…

http://www.cie-parler-noir.fr

Gric de Prat

Gric de Prat

Mauaisit d’abordar la cultura occitana en Gironda shens passar per Gric de Prat. Tirant son nom d’un poèta medoquin deu siègle passat, aqueth grop, qu’es tot purmèir una istòria de familha, vòu tornar balhar a l’occitan girondin sas letras de noblessa. Dens lo linhatge de la musica populària e tradicionala, la formacion multiplica las passejadas dens lo barròc e lo classic, esquissant un Bordèu d’una epòca ont lo gascon estot a l’encòp la lenga deus airs popularis e d’una musica escriuta, la deu conte coma la deu teatre, la de la rua coma la de la cort.

Barrejant mantunas epòcas e mantuns estiles, Gric de Prat es donc tanben per tots los atges e tots los publics.

http://gricdeprat.com

Lous Caps Negues

Lous Caps Negues

Patoès ? Gascon ? Occitan ? Lous Caps Negues ne s’encombran pas d’explicacions ociosas. Una sola causa compta : hèser partatjar au public lo plaser qu’an d’èster sus la scèna. E la scèna, la tienen ! Entre baladas irlandesas e fòlc gascon, o inversament, aquesta equipa esberida de Vasadés raconta dens sa lenga e dab sos mots çò que li ten au còr : lo rugbí, los amics, la hèsta… En un mot : la via !

http://www.myspace.com/louscapsnegues

Thèu

Thèu

Lo teatre de qualitat es rare en occitan. E lo teatre preus mainatges enqüèra mèi. L’espectacle Thèu (sortida junh 2012) es de v’rai navèth dens lo paisatge culturau occitan. Portat preu collectiu l’Art Hache Scène, conta l’istòria d’un drollet confrontat a sos sovíers de mainatge. En francés e en occitan, l’istòria de Thèu harà tanben l’objèit d’una adapatacion en libre-CD de joenessa. En esperant, es possible d’en aver una mustra demb de lecturas publicas, teatraus e ilustradas, dens la region.

http://www.art-hache-scene.com/

Tre Fontane

Tre Fontane

L’Ensemble Tre Fontane es lo passaire modèrne de l’art deu Trobar, art deus Trobadors de l’Atge Mejan. Especialistas deus trobadors aquitans, com Bertrand de Born o Arnaut Daniel, lo triò (que’s pòt mudar a còps en vrai orquèstre) tòrna téisher los ligams qu’existèvan a l’epòca entre la musica de las corts d’Occitània e la cultura arabò-andalosa, shens la quau ne pòdem pas compréner tot la beutat d’aquera epòca literària e artistica redde florida.

http://www.albacarma.com/index.php?page=ensemble-tre-fontane

Vieussens

Vieussens

Sol o acompanhat, Christian Vieussens multiplica los projèctes atipics, mes evolua a tengut dens o a l’entorn de Gironda, que desclami poeticament las òbras de Bernat Manciet, lo gran escrivan gascon, o que conti la via e las istòrias deu Bassin. Lo fau véser ténder ponts dab la pintradura, la musica (que sii tradicionau, modèrna, jazz, o d’improvisacion…), la poesia, la literatura, l’etnologia, lo teatre… per compréner que la cultura occitana es viva, e, sustot, enqüèra capabla de crear causas navèras de vrai. E, au rang d’aquestes creators occitans, Christian Vieussens es incontestablament un deus milhors d’Aquitània.

http://vieussens.fr/

Publicacions

Espècias de Medòc

Los Tradinaires

Dumpèi trente ans, una associacion medoquina, Los Tradinaires, cultiva la declinason locala dau gascon, dens das obradeirs de lenga e d’escritura. Das reculhs sortits de lur trabalh an estats publicats, recaptans dishudas, contes, poesias, cançons, totjorn en gascon medoquin. Cabirolar los mòts, publicat en 2006 per lurs sonhs, a obtengut una mencion especiala deu prèmi Jaufre Rudel, prèmi literari en occitan organizat per l’Ostau Occitan – IEO 33.

Lur darrèria produccion es un erbèir, presentans la flòra dau Médoc, una flòra tant especifica ad aqueste territòri unic que se pòt pas maginar de la repertoriar sens la lenga que la sap milhor descriure.

regine.ardilley@orange.fr

Boha

De publicacions en prèmis literaris

Dempui sa creacion dens las annadas 60-70, l’Ostau Occitan vòu desvolopar l’escriut occitan, un deus axes de l’Institut d’Estudis Occitans, coma son nom ec mòcha en partida.

Dens las annadas 70, l’Ostau ajuda a la publicacion, quand ne publica pas eth-medís, òbras d’autors occitans locaus, coma documents a vocacion mèi pedagogica. Entremitan aqueths es lo preciós Gironda Tèrra Occitana, un precís d’istòria, de geografia, de cultura e de lingüistica girondina, accessible a tots.

Aqueths escriuts son anuit disponibles a la Bibliotèca de l’Ostau Occitan, au 171 avinguda de la Palhèira à Pessac. Contactatz-nos per ne’n saber mèi !

A costat d’aquò, e ajudat per la seccion locala deu Felibrige, l’Ostau Occitan metut en plaça un prèmi literari, lo prèmi Jaufre Rudel. Autors reconeishuts lo receburen :  Marcèla Delpastre, Joan Ganhaire, Jean-Yves Royer… Egau, lo Prèmi Jaufre Rudel es actualament suspendut, ende perméter la neishença d’un prèmi literari mèi bèth e damb autes actors deu sector.

Hestenaus

Nuits Atypiques

Las Nueits Atipicas

Ne’s pòt aunèstament pas esperar hèser decobrir las Nèits Atipicas a un Girondin. Aqueth hestenau estivau vasut en 92, miat per Patric Lavaud, se hasot un nom en majusculas dens lo monde deus hestenaus e dens lo de las musicas deu monde, son especialitat. D’aquí, d’alhons, tradicionalas, modèrnas, tribalas, urbanas, totas las esteticas musicaus son valorizadas, per un discors sus las diferéncias, la ciutadanetat e l’obertura aus autes. Dempui sa creacion, un pilòt d’artistas occitans se son produsits suus emponts de Lengon e l’engatjament de Patric Lavaud per la defensa de la lenga occitana n’es pas mèi a provar. E aquò se tradusís en accions tot l’an, dab produccions e diffusions de films, expausicions, debats… Un label discografic, Daqui, es quitament vasut en 98, ende hèser conéisher mèi larjament los artistas revelats per las Nèits Atipicas, dab pro de gropes occitans (pòden tanben parlar de la compilacion “Occitània qu’es aquò ?”, vista variada de la musica occitana actuala).

Las Nèits Atipicas son tanben a l’origina, dempui quauquas annadas dejà, d’un Forum de las Lengas, que sèrv d’introduccion. Aqueth Forum amassa representents de lengas de França (Bascos, Bretons, Creòles, Alsacians, Còrses…), elegits, actors culturaus, associatius, a l’entorn de la question de las lengas regionaus en França. En abordant las causas de faiçon politica dab los intervenents nombrós e de qualitat, la reflexion miada a un pes solide !

http://www.nuitsatypiques.org

Occitania Mon Amour

Occitania mon amour !

Enqüèra pro joen, lo hestenau Occitania mon amour ne manca pertant pas d’una ambicion : èster la referéncia regionala de la creacion contemporana occitana. A chivau sus Gironda e Dordonha, çò que se sent dens sa programacion, son director Sylvain Roux (artista eth-medís) perpausa un chic de tot : musica, conta, conferéncia, teatre, bal, cinemà… Sovent, los espectacles perpausats son nèus, diferents, benlèu desconcertents e representan vraias presas de risc artistic, signe de la vivacitat de la creacion culturau. Rencontras improvisadas, jòcs sus aqueras diferéncias nos amainan, demolicion en règla de las idèias recebudas, una causa es segura : Occitania mon amour ! refresquís un maximum l’Occitania musicau !

http://www.saintefoylagrande.net/

Affiche MascaretHestenau Occitan Mascaret

Après mèi d’una assajada, dau hestenau occitan d’Aisinas a las Jornadas Occitanas deu MED’OC (Mouvement des Etudiants d’Occitan), l’Ostau Occitan a eth tanben portat son evenement occitan sus la CUB. La permèira edicion de Mascaret se tengut en octobre 2012. L’Ostau Occitan, fòrt daus ligams teishuts damb los actors culturaus, associatius e politics, tribalhèt quauques mes sus un tau projècte. Sau modèle dau hestenau Occitània, a Tolosa e a l’entorn, aqueth evenement torna amigar l’occitan e la ciutat, dus mondes que se pensavan brolhats per jamèi. Daus concèrts a Cenon, daus bals a Peçac, daus films a Bordèu, de las animacions divèrsas, pertot, per tots los publics, aquí la jòga dau hestenau occitan de Bordèu. A lèu per una novèra edicion ! Pòdetz totjorn veire lo programa de la darrèira edicion.

Per presentar vòsta produccion, entrar en contact damb los artistas, obtenir daus rensenhaments sus la cultura occitana, contactatz nòste administrator cargat de la cultura a cultura@ostau-occitan.org