L’òc a l’escòla

L’aprentissatge d’una lenga, l’occitan com las autas, se diu hèser, s’es possible, de tot joen avant. En Gironda, pòden seguir un percors dab un minimum d’occitan de la mairala a la facultat.

Apréner l’occitan permet au dròlle :

  • De compréner milhor l’identitat (cultura, istòria, lenga…) d’un territòri. Aquò ajudarà tanben a trobar o tornar trobar son identitat pròpa.
  • De hèser mèi aisit l’aprendissatge de las autas lengas, notadament las lengas romanicas (espanhòu, italian, portugés, romanés…) dont l’occitan hèi partida.
  • De possedir un bagatge unic, que se poirà utilizar e valorizar dens mantas brancas professionalas (ensenhament, documentacion, cultura, artistic, patrimòni…)

Calandreta

CalandretaLas Calandretas son una federacion d’escòlas, principalament mairalas, associativas e laïcas. Lo sistèma d’aprentissatge foncciona per immersion lingüistica, es a díser que tot o partida deus cors se hèsen en lenga occitana. Amèi, las Calandretas emplègan la pedagogia Freinet, una tecnica originala que bota lo dròlle au centre deu processús educatiu. Atau las Calandretas son l’equivalent per l’occitan de las escòlas bretonas Diwan o de las Ikastolas bascas. Après 30 d’existéncia, los resultats obtenguts son hòrt positius, e las enquèstas moishèren que dròlles sortits de Calandreta arribèvan mèi a assimilar los ensenhaments e a trobar un trabalh en seguint.

Existissen en Gironda 2 Calandretas :

  • La Calandreta de la Dauna a Pessac
    33 avinguda de Genève
    33600 Pessac
    tel : 05 56 04 13 83
  • La Calandreta du Siron a Barsac
    rua de las Escòlas
    33720 Barsac
    tel : 05 56 76 52 43

L’escòla bilingüa

L’ensenhament bilingüe francés-occitan a paritat orària (50% deu temps escolari en francés, e 50% en occitan) es un ensenhament que pòt estar botat en plaça per l’educacion nacionala sus demanda deus parents d’eslèves. Un còp aviat, aqueth ensenhament ne tòca pas que los escolièrs que n’an hèit la demanda e los parents pòden causir entre las duas filièras(bilingüa o monolingüa). Aqueth ensenhament se seguís de l’escòla mairala avant e se pòt perseguir dinc au licèu.
En Gironda, una purmèra classa bilingüa de Gironda estèt botada en plaça dens la comuna de Cuçac sus l’iniciativa deu maire. I son adara duas classas bilingüas, dab un quarantenat d’escolièrs.
L’associacion Òc Bi Aquitània (associacion de parents d’eslèves bilingües), trabalhèt a l’obertura de la classa bilingüa de Cuçac, e a per objectiu màger lo desvolopament d’aqueras filièras capvath Aquitània. L’assocacion trabalha dens lo quadre de la convencion signada entre lo Conselh Regionau e lo Rectorat de Bordèu, convencion que diuré menhar a l’espelida d’autas classas bilingüas dens lo departament… A seguir !

ocbi

L’Occitan en opcion

L’Educacion nacionala permet l’ensenhament de l’occitan a de las autas lengas regionalas de faiçon opcionala (un nombre redusit d’òras per setmana). Mantuns collègis e licèus de Gironda perpausan cors d’occitan :

Collègis

  • Montesquieu a La Brèda
  • Paul Esquinance a La Rèula
  • Jules Ferry a Lengon
  • Pian
  • Champ d’Eymet a Pelagrua
  • François Mauriac a Sent-Sefrian

Licèus

  • Montesquieu a Bordèu
  • Jean Renou a La Rèula
  • Jean Moulin a Lengon
  • Odilon Redon a Paulhac

Universitat

Un percors de Letras-Occitan a l’Unviersitat Michel de Montaigne Bordèu III permet de doblar un cursus literari francés dab un aprentissatge de la lenga, de la literatura e de la cultura occitana. Aquesta licéncia pòt estar hèita shens aver practicat l’occitan avant.

A la seguida d’aquesta licéncia, un Master (bac+5) de Letras conten occitan opcionau, com la preparacion au CAPES de Letras Modèrnas (escriut e orau).

Per mei de rensenhaments, contactatz nòste administrator cargat de la question de l’ensenhament a ensenhament@ostau-occitan.org

Ligams Utiles

http://www.occitanetudesmetiers.com/occitan-universite-bordeaux.htm

http://ocbiaquitania.free.fr/